Archivo de la etiqueta: refundació refundación refondacion

Defensors d’Aran

Eth nau moviment polític que s’està creant en Aran dejà a ua prumèra prepausa de nòm “Defensors  d’Aran”. Intuïsqui que non serà era soleta opcion  que i age. Mès, auem decidit que l’auem d’escuélher entre toti. Un sistema d’eleccion dubèrt, participatiu e innovador.

Aguesta prumèra opcion, que jo madeish placi a disposicion deth País a estat estudiada, conceptualitzada e contextualitzada. Ei ua prepausa que nèish dempús d’un estudi que e portat a tèrme enes darrers mesi. Un estudi estructurat, per ua banda, ena lectura de çò qu’a significat enquiara CDA-PNA, per ua auta s’a realizat un analisi des principaus reptes qu’auem auè es organitzacions polítiques e eth sistema polític existent, un tresau blòc basat enes principaus amenaces qu’auem coma País (Aran)  e  un darrèr blòc a on s’a estudiat eth model de País que volem (progrés individuau e progrés colectiu).

Estam creant un nau moviment polític, dubèrt, modèrn, innovador, transformador e colectiu tamb un objectiu insubornable; Aran e era societat aranesa per deuant de tot e de toti. No serà ne de dretes, ne d’esquerres, serà tòn, men e sòn (des persones), era persona en centre des nòsti objectius e dera nòsta accion politica des des institucions. Volem empoderar ath pòble aranès entà decidir eth sòn futur tant individuau coma colectiu e non renonciam a hèr possible lo impossible, ei a díder a hèr realitat aquerò qu’auè forces polítiques araneses ben impossible. Neishem tamb vocacion de servir gobernant es institucions e  construsir eth futur tamb naues maneres de hèr e de trebalhar. Resumit: Prumèr Aran, d’ua manera diferent entà un País melhor.

Jo, prumèr Aran

Eth 26 de junh i tornarà a auer eleccions ath Congrés e ath Senat. Se tornaran a repetir uns comicis per incapacitat política, per cagires, per interessi partidistes e sustot perquè saben (es quate grani partits polítics) que en definitiva tornaram a votar, protestaram mès mos conformaran, e perquè sa’n tret era responsabilitat deth dessús e la tornen a dar ara ciutadania entà que decidisque.

Ara ja non podem parlar dera naua e dera vielha politica, toti son culpables dera situacion ena que mos trapam. Ara, sò més sorprenent ei, coma liegen es partits era aritmetica parlamentària, ath marge de que toti, eth 26J tornaran “a guanhar”e arres aurà perdut, non entenen qu’era politica ei er “Art Democràtic deth Pacte”, cap d’eri entén qu’en politica pactar non vò díder traïr ath tòn electorat senon respectar eth resultat der aute e sustot eth resultat qu’eth pòble a dat a trauèrs des urnes. Quina miopia, quin pòc esperit democràtic!

Mès, tamb aguestes eleccions auram era solucion definitiva entà auer govern en Espanha? Me da que non! E alavetz? Tornaram a ues tresaus eleccions? Me contente que Pedro Sánchez (PSOE) a dit que non i aurà d’autes eleccions, e alavetz me demani que vò díder Pedro Sánchez? Que darà suport ath PP? Que darà suport a Unidos Podemos se eth PSOE perd era dusuau plaça? Que pretén guanhar es eleccions? Coincidiratz tamb jo que tot son preguntes sense respòsta! O non! E lo pitjor de tot, era Union Europea demore auer govern en Espanha entà retalhar mès de 8.000M€ en servicis públics. Tot plegat un laberint tant complèxe e trist que jo ac hè clar, eth 26J prumèr nosati, prumèr Aran!

 

(columna publicada en diari Segre deth dia 4 de junh de 2016)

Eth centre polític d’#Aran

A partir deth pròplèu mes d’octobre, CDA-PNA desapareisherà. Crearam u anaua organitzacion politica atractiva, innovadora, transformadora e colectiva. Non renonciaram ad aquerò qu’auem estat, non reconciaram ara òbra de trebalh hè-ta en Aran e non renonciaram ath progrés qu’a aufèrt CDA as ciutadans d’Aran e ath País pendents mès de vint ans. Mès, era societat mos exigís canvis, naues maneres de hèr, naui lideratges e respòstes mès accelerades.Auè Aran e es aranesi e araneses (toti es que viuem e trebalham en Aran) auem deuant nòste naues amenaces e naui reptes. Progrès entà toti e Identitat de toti, son un binòmi indissoluble se volem contonhar creant oportunitats entès mès petits, entara joenessa, entara creacion de trebalh e qualitat de vida e entara nòsta gent grana. Era identitat diferenciada qu’auem e era sua preservacion ei era soleta garantia entà que totes es amenaces que vedetz e reptes que estam diboishant non abolisquen es nòsti servicis públics (sanitat, servicis sociaus, patrimoni naturau, tradicions e d’auti) e era nòsta economia.

Guardetz era television, liegetz es diaris, escotetz era ràdio e arribaratz a ua conclosion màxima. Sonque i a dues opicions: 1) defenem çò qu’auem, enfortim era nòsta capacitat politica a trauers dera identitat aranesa e cream oportunitats (naui servicis públics, lòcsde trebalh, mès empreses, eca), ò, 2) obedint a populismes, verbalismes, autoritarismes, recentralisme e estatalisme qu’ei sò que vò hèr (PP, UNIDOS PODEMOS, PSOE, ADA COLAU  e CIUTADANS) e sonque anaram entà darrèr. Tu as era paraula!