Archivo de la etiqueta: #tornobert #convergencia aranesa

Defensors d’Aran

Eth nau moviment polític que s’està creant en Aran dejà a ua prumèra prepausa de nòm “Defensors  d’Aran”. Intuïsqui que non serà era soleta opcion  que i age. Mès, auem decidit que l’auem d’escuélher entre toti. Un sistema d’eleccion dubèrt, participatiu e innovador.

Aguesta prumèra opcion, que jo madeish placi a disposicion deth País a estat estudiada, conceptualitzada e contextualitzada. Ei ua prepausa que nèish dempús d’un estudi que e portat a tèrme enes darrers mesi. Un estudi estructurat, per ua banda, ena lectura de çò qu’a significat enquiara CDA-PNA, per ua auta s’a realizat un analisi des principaus reptes qu’auem auè es organitzacions polítiques e eth sistema polític existent, un tresau blòc basat enes principaus amenaces qu’auem coma País (Aran)  e  un darrèr blòc a on s’a estudiat eth model de País que volem (progrés individuau e progrés colectiu).

Estam creant un nau moviment polític, dubèrt, modèrn, innovador, transformador e colectiu tamb un objectiu insubornable; Aran e era societat aranesa per deuant de tot e de toti. No serà ne de dretes, ne d’esquerres, serà tòn, men e sòn (des persones), era persona en centre des nòsti objectius e dera nòsta accion politica des des institucions. Volem empoderar ath pòble aranès entà decidir eth sòn futur tant individuau coma colectiu e non renonciam a hèr possible lo impossible, ei a díder a hèr realitat aquerò qu’auè forces polítiques araneses ben impossible. Neishem tamb vocacion de servir gobernant es institucions e  construsir eth futur tamb naues maneres de hèr e de trebalhar. Resumit: Prumèr Aran, d’ua manera diferent entà un País melhor.

Joenessa &“Adultocracia”

Comence a èster ua evidéncia era diferéncia qu’existís entre era joenessa e  adults e gent gran (adultocràcia) en compréner era societat d’aué. Se constate un gran distanciament ideològic entre era joenessa e era adultocràcia ena nòsta societat. Aué açò non ei un problema. Mès, aurà repercussions en temps ena quotidianitat des ahèrs de convivéncia. Tot tant evident coma qu’era joenessa, pes sues prioritats intrinseques, ei indefensa ara ora de decidir sus eth sòn futur.

Per méter quauque exemple: era gessuda de Gran Bretanha dera Union Europea l’a decidit era “adultocracia”.Era joenessa votec majoritàriament entà quedar-se. A qui afectarà en gran mesura eth Brexit d’ací a dètz ans? As que aué son joeni. Les afectarà en contra dera sua volentat. Quina contradiccion!

Un aute exemple poderie èster eth resultat des passades eleccions generaus en Espanha. Era esquerda ideologica intergeneracionau ei tanben mès que evidenta. Era “adultocràcia” pretén contunhar un model de sistema que non a funcionat. Un sistema que ei caduc. Un sistema qu’aurie de vèir prohonds canvis. Mès, coma tostemp, aguesti canvis non arriben. Era adultocracia tamb era sua pòur torne a decidir e se met ua vena enes uelhs. Resultat: “mas de lo mismo”.

Era democràcia ei era acceptacion de majories e eth respecte as minories. Ei evident! Tant evident coma qu’era part dera adultocracia qu’apòste peth canvi en favor d’un futur melhor entara joenessa merite era mia felicitacion. Fin finau son es madèishi que de joeni e joenes reivindicauen un futur melhor entad eri. Contunham trebalhant en benefici d’Aran e deth pòble aranés.

25 ans de progrés en Aran

Ja sonque demore ua setmana entà que tornem a votar en ues eleccions ath Congrés e ath Senat. En darrèr article me preguntaua se i auríen ues tresaus eleccions. Ei tot un autentic drama polític e democràtic!!! Se mos trapèssem en un País exigent en cultura democratica, aguest se prestarie a castigar a toti aqueri partits que non definisquen clarament eth sòn posicionament entà auer-i un govern.

Ara, guardetz çò qu’auem en Aran (er espitau, es servicis sociaus, es servicis laboraus, eth producte torístic globau e tantes causes mès), guardetz eth model productiu e econòmic qu’auem en Aran, pensetz en miracle de conservar encara era nòsta identitat, sustot era nòsta lengua, comparetz tamb d’autes realitats e arribaratz a ua clara conclosion; aquerò que depèn de nosati ac auem metut en valor, ac auem melhorat e tamb orgolh podem díder qu’ei gràcies a que mos ac auem creigut e ac auem defensat. Tot s’a artenhut e vertebrat gràcies ara luita de fòrça persones, quinsevolh que sigue eth color polític, que tostemp an metut Aran peth deuant dera resta. Aran e toti nosati èm de celebracion des 25 ans dera reinstauracion des  institucions araneses. Aguest ei eth gran secret, auer es nòstes institucions. Auer-les mos permet auer un projècte pròpi entà Aran que garantisque eth benèster, eth progrés e es oportunitats entà toti e totes, independentament de a on agen neishut o de on venguen. Es hèts ac demòstren.

Desde Convergéncia mo’n sentim orgolhosi deth trebalh hèt, en definitiva, auram gobernat 19 des 25 ans des dera reinstauracion deth Conselh Generau d’Aran. Gràcies e rebrembetz #PrumerAran